परमहंस परिव्राजकाचार्य श्रीवासुदेवानंद सरस्वती (टेंब्ये) स्वामी महाराज
भगवत्पूज्यपाद श्रीमदाद्य शंकराचार्यांनंतर, आसेतुहिमाचल परिभ्रमण करून, संन्यासाश्रमाच्या मानदंडांचे परिपालन अत्यंत काटेकोरपणाने करून, शास्त्रमर्यादांचे किंचितही उल्लंघन न करता अत्यंत मोठी, अद्भुत वाङ्मयनिर्मिती करणारे असे केवळ श्रीस्वामी महाराजच म्हणावे लागतील. आदर्शांच्या वस्तुपाठांनीही त्यांच्या श्रीचरणी बसून शास्त्रांची मूळाक्षरे गिरवावी; अशी श्रीस्वामी महाराजांची विलक्षण शास्त्रपूत जीवनशैली होती.
प.प. श्रीस्वामी महाराजांची सारी ग्रंथ रचना ही अतिशय विस्मित करणारी आहे. प.प. श्रीस्वामी महाराजांची ग्रंथ रचना पुढीलप्रमाणे:
अ) संस्कृत:
१)श्रीगुरुसंहिता २)श्रीदत्तपुराणम् ३)श्रीगुरुचरितम् ४)दत्तचम्पू: ५)त्रिशति-गुरुचरित्रम् ६)कुमारशिक्षा ७)युवाशिक्षा ८)वृद्धशिक्षा ९)पंचपाक्षिकम् १०)योगरस्य ११)बोधरहस्य (यातील काही ग्रंथ सटीक आहेत)
ब) मराठी:
१)श्रीदत्तमहात्म्य २)श्रीदत्तलीलामृताब्धिसार ३)श्रीसप्तशतीगुरुचरित्रसार ४)माघमहात्म्य ५)प्राकृत मनन ६)स्त्रीशिक्षा ७)आत्मचिंतन ८)पत्रसंग्रह ९)संस्कृत-मराठी ४०० हून अधिक स्तोत्रे, पदे.
श्रीदत्तभक्ती, मंत्रगर्भता, भावमयता, परब्रह्म स्वरूपता, प्रापंचिक दु:खनिवारणक्षमता, वेदशास्त्रपुराणोक्तता याशिवाय अत्यंत आशयगर्भ रचना, अर्थ-सौंदर्य, रचना-सौष्ठव रसात्मकता, व्याकरण शुद्धता अशा अनेक अभिजात गुणवैशिष्ठ्यांनी समृद्ध अशी श्रीस्वामीमहाराजांची दिव्य साहित्य संपदा आहे.
श्रीपाद सेवा मंडळाच्या श्रीवामनराज प्रकशनाद्वारे 'अक्षय वाङ्मयमाला' योजनेअंतर्गत ही सर्व ग्रंथसंपदा प.प.श्री स्वामी महाराजांच्या कृपा-आशीर्वादाने पुन:प्रकाशित होत आहे.